Jang Seru: Biar Merakyat

0
Bujang Seru. Ilustrasi: Riko

Cerita pada rubrik “Jang Seru” ini hanya fiktif. Jika ada kesamaan nama, tempat, waktu, maupun peristiwa, itu adalah kebetulan belaka.

Bujang: “Pagi, Wak. Kulup mano?”

Wak Dolet: “Pagi jugo, Jang. Nah, ntah lah yo. Dari tadi Wak Lum nengok dio.”

Wak Dolet melanjutkan nyapu lantai. Sepagi ni, baru Bujang pelanggan Warung Seru punyo Wak Dolet yang datang. Sesudah beberes, Wak Dolet ke dapur, trus ke luar lagi bawak kopi untuk Bujang.

Bujang: “Sayo lagi nyari Kulup nian, Wak. Kabarnyo dio lagi tesinggung berat samo rajo.”

Wak Dolet: “Nah, ngapo lagi dengan rajo tu?”

Wak Dolet yang penasaran, akhirnyo duduk di sebelah Bujang.

Kulup: “Wak kan tau, Kulup nak maju. Icek-iceknyo kalo zaman dulu, dio ni nak maju jadi adipati.”

Wak Dolet: “Trus?”

Bujang: “Masalahnyo, baru be nak maju sebagai calon adipati, eh, rajo lah turun pulak bantu calon adipati lain.”

Wak Dolet: “Trus?”

Bujang: “Yo, itu lah, Wak. Masak rajo kayak gitu, mestinyo kan, sebagai rajo, harus netral.”

Wak Dolet: “Trus?”

Bujang: “Trus numbur! Wak ni, trus-trus bae jak tadi. Ai dah.”

Wak Dolet senge-senge bae.

Kulup datang. Mukonyo suntuk nian. Dio duduk di antaro Wak Dolet samo Bujang. Di belakangnyo nyusul Ucok.

Kulup: “Kopi, Wak. Duo. Sekok kayak biaso, sekok dak pakek gulo.”

Ucok: “Pakai gula, ya, Wak. Sembarangan kau ini, Lup, apa kau pikir aku Luwak yang suka kopi pahit. Nggak beres ini…”

Kulup: “Iyo iyo, gulonyo sikit bae, Wak.”

Ucok: “Alamaakkk… pelit kali kau ini. Dari lahir kukira pelitmu ini, Lup. Ya, udahlah. Sukak-sukak hatimu lah. Yang penting ngopi…”

Wak Dolet tegak, bejalan ke dapur. Tigo orang ni tediam di meja. Kulup langsung nengok ke Bujang.

Kulup: “Lah dapat kabar kan, Jang?”

Bujang: “Yo, prihatin sayo nengok awak tu, Lup.”

Kulup: “Itu lah, Jang. Awak nak maju, eh, kok dio yang malah sibuk.”

Ucok: “Betul itu, sebenarnya, yang mau maju adipati itu raja atau kerabatnya. Kalau memang dia, ya, turun kelas namanya.”

Ucok yang ketuo tim sukses Kulup mulai nyenyes.

Ucok: “Tapi kau tenang aja, Lup. Besok kutemui raja, tu. Biar kuselesaikan secara damai.”

Kulup: “Serius awak, Cok? Bisa?”

Ucok: “Eh, macam tak percaya aja kau sama aku. Besok kalau dia gak brenti turun-turun ke RT-RT lagi, jangan sebut nama aku.”

Bujang: “Pegang omongan tu, Cok.”

Ucok: “Iya!”

Wak Dolet datang bawak kopi. Dio bingung nengok ketigonyo tediam elok.

Besoknyo, Bujang samo Kulup lah tibo lagi di Warung Seru. Nunggu Ucok yang katonyo bawak kabar gembira.

Kulup: “Tadi Ucok nelpon, katonyo Rajo lah diamankan dio.”

Bujang: “Yo apo?”

Kulup: “Ntah jugo lah, Jang. Tapi kito dengar be langsung dari dio critonyo.”

Dak lamo, Ucok datang. Mukonyo yang hitam legam tu cerah nian. Dari jauh be dio lah nyenge lebar.

Ucok: “Apa kubilang, sudah kuamankan dia. Beres! Sekarang kau bisa santai, Lup. Jalan lagi kita.”

Kulup: “Bebenar, Cok. Cam mano critonyo?”

Ucok duduk. Disambarnyo pisang goreng di meja.

Ucok: “Semalam kutemui dia. Kukasih pengertian. Sampe-sampe, kubilang sama dia, kalau raja turun langsung pemilihan adipati, itu sama saja turun kelas. Eh, dia malah protes.”

Kulup: “Trus?”

Ucok: “Ya, kata dia, dia memang mau turun langsung. Alasannya biar merakyat, begitu. Tapi aku gak kehilangan akal. Kubilang sama dia, ‘kalok raja mau merakyat, bukan begitu caranya. Ada jalan lain biar lebih dekat dengan rakyat’.”

Kulup: “Trus?”

Ucok: “Trus kepalak kau botak. Capek aku ngoceh trus, tapi kopi gak ada. Kau pesan dulu sama ku kopi kek kemarin, yah.”

Kulup: “Waaakkk… kopi pahit untuk Ucoook…”

Ucok: “Alamaaakk…”

Wak Dolet ke luar. Bawak kopi kayak kemaren untuk Ucok. Habis tu Wak Dolet ke dapur lagi.

Bujang: “Penasaran nian sayo ni, Cok. Trus cam mano lah akhirnyo crito rajo tu?”

Ucok langsung neguk kopi tu. Separoh gelas langsung habis.

Ucok: “Kalian ikut aja. Ayok lah. Biar jelas.”

Akhirnyo Bujang samo Kulup tegak. Trus ngikut Ucok yang lah duluan jalan.

Ucok: “Dekat simpang sini lah.”

Bujang-Kulup setengah belari ngejar langkah Ucok yang cepat tu. Sampai di simpang, Bujang samo Kulup tekejut setengah mati.

Ditengoknyo ado rajo lagi nempel ban mobil truk. Bekeringat-keringat keningnyo.

Ucok: “Kelian lihat kan. Kalau mau merakyat, mending jadi tukang tempel ban aja sekalian, begitu kubilang sama raja. Eh, dia mau. Jadilah kek gitu dianya. Jadi merakyat sangat.”

Bujang samo Kulup nepuk kening.(serujambi)

Loading Facebook Comments ...
loading...