Jang Seru: Donatur Calon

1
Jang Seru. Foto: Riko/SeruJambi

—Cerita pada rubrik “Jang Seru” ini hanya fiktif. Jika ada kesamaan nama, tempat, waktu, maupun peristiwa, itu adalah kebetulan belaka.

Ucok dekati Bujang yang lagi jalan ke Warung Seru punyo Wak Dolet. Ditepuknyo pundak Bujang agak keras. Bujang tekejut, mulai nak sewot.

Bujang: “Apohal, Cok?”

Ucok: “Tenang coy, tenang…”

Bujang: “Awak mukul-mukul cam tu, maksudnyo apo?”

Ucok: “Ah, sikit cuman. Ngopi dulu kita.”

Akhirnyo Bujang samo Ucok duduk di tempat biaso. Meja dekat pintu masuk warung Wak Dolet. Wak Dolet datang, langsung masuk ke dapur lagi. Dak lamo muncul lagi sambil bawak duo gelas kopi.

Wak Dolet: “Kamu beduo kabarnyo nak nyalon Kades, yo?”

Bujang: “Iyo, Wak.”

Ucok: “Betul itu!”

Wak Dolet: “Yang damai bae, yo. Sapo bae yang menang, harus tetap ke warung wak. Tapi kalo menang, harus bayar, jangan ngutang lagi.”

Ucok: “Aman lah itu, Wak.”

Wak Dolet akhirnyo duduk.

Wak Dolet: “Memang kamu beduo ado duit nak nyalon? Kan butuh duit nyalon apo bae sekarang ni.”

Bujang: “Kalo sayo lah aman, Wak. Donatur siap bantu.”

Ucok: “Macam kau aja yang aman. Aku juga, donatur ku sangat kuat. Superrrr…”

Kulup datang, mukonyo cerah nian.

Ucok: “Macam bunga anak satu ini. Hahahaha…”

Kulup: “Apo, Cok. Banyak bunyi awak ni.”

Ucok: “Ais! Muji aja kenak marah kita.”

Bujang samo Wak Dolet ketawo ringan.

Wak Dolet ke dapur lagi. Ke luar bawak segelas kopi untuk Kulup.

Wak Dolet: “Ngapo macam senang nian awak ni, Lup?”

Kulup langsung minum kopi panas tu. Sedap nian nengok dio yang lagi neguk kopi.

Kulup: “Yo, lah, Wak. Sayo ko baru beli tanah. Duo bidang. Murah nian, Wak.”

Bujang: “Maak… mantap tu, Lup.”

Ucok: “Lain kali kalok dapat yang murah-murah seperti itu, kasih tahu sama aku, Lup.”

Kulup ketawo ringan. Girangnyo nampak nian. Wak Dolet duduk lagi dekat tigo sekawan tu.

Wak Dolet: “Memang kamu beduo ado duit apo nak beli tanah? Katonyo nak nyalon kades, butuh duit banyak.”

Bujang samo Ucok diam.

Ucok: “Tanah ada, Wak. Uang juga ada. Aman lah.”

Bujang dak mau kalah.

Bujang: “Iyo, duit masih banyak, Wak. Belum lagi pakek duit donatur tu.”

Kulup: “Donatur apo? Sapo yang kamu maksud ni?”

Bujang samo Ucok lagi-lagi diam.

Ucok: “Kawan kita, lah. Kau pasti kenal, Lup.”

Kulup mikir. Kepalaknyo berasap saking berat nian mikir.

Kulup: “Maksud awak, Cok, si Acong?”

Ucok ngangguk-ngangguk. Bujang tekejut.

Bujang: “Acong bantu awak jugo yo, Cok?”

Ucok: “Hah, maksudmu, dia bantu kamu jugak? Alamaaak… sama berarti donatur kita.”

Wak Dolet senyum-senyum. Kulup mulai diam. Dak lamo HP Kulup bebunyi. Diangkatnyo.

Kulup: “Yo, Cong. Sayo di Warung Seru, lagi ngopi. Hah, soal sertifikat tanah tu, kagek malam bae sayo ambek di rumah awak. Duit lah sayo transfer barusan, yo. Ok. Ok…”

Kulup nutup telpon. Bujang samo Ucok melongok.

Bujang: “Yang nelpon sapo? Acong yo?”

Kulup ngangguk. Ucok yang bemuko hitam tu mulai pucat.

Ucok: “Eh, Lup. Cobak kau jawab dulu. Tanah murah yang kau beli itu apa dari si Acong?”

Sekarang gantian Bujang yang pucat.

Bujang: “Tanah di mano yang awak beli, Lup?”

Kulup santai be.

Kulup: “Sekok dekat simpang dusun tuo, sekok lagi dekat sungai dusun tuo. Masing-masing sehektar.”

Keringat dingin mengucur di kening Bujang samo Ucok. Dak lamo HP Bujang samo Ucok bebunyi. Ruponyo Acong yang ngirim pesan WA.

Isi WA dari Acong: “Jang, Cok, maaf yo, sayo lagi butuh modal. Karno kamu beduo butuh duit, dan sudah kupinjamin kemaren, tepakso sertifikat kamu beduo yang digadai ke sayo, sayo gadai lagi ke Kulup. Kalo kamu beduo malam ni dak bayar pinjaman kemaren, tepakso tanah tu kujual nian samo Kulup. Ekonomi lagi sulit. Maaf nian sobat.”

Ucok samo Bujang kejang-kejang di lantai.(serujambi)

Loading Facebook Comments ...
loading...