Jang Seru (Humor): Bensin

0
Bujang Seru. Ilustrasi: Riko

Lah dari pagi Kulup samo Wak Dolet di warung kopi. Keduonyo crito-crito sampai matahari lah tinggi. Pas nak balek, keduonyo nengok bujang jalan sambil dorong motor.

Kulup: “Oi, Jang! Kenapo motor kau tu?”

Wak Dolet samo Kulup langsung nyambut Bujang. Dibantunyo Bujang markirin motor. Habis tu ketigonyo masuk warung lagi.

Wak Dolet: “Apo keno motor awak ni, Jang? Businyo apo mesinnyo?”

Bujang: “Busi bagus, mesin bagus, Wak.”

Kulup: “Lah, trus apo yang keno?”

Bujang: “Minyak nyo.”

Wak Dolet: “Habis yo? Ngapo dak diisi?”

Bujang: “Dak ado bensin, Wak.”

Kulup: “Pertalite bae ngapo?”

Bujang: “Mahal nian.”

Kulup: “Wai, Jang, dikit nian selisih hargonyo.”

Bujang duduk dekat Wak Dolet. Trus narok kunci motor di meja.

Bujang: “Wak samo Kulup ni dak baco berita. Jaman lah berubah Wak, Lup. Subsidi untuk rakyat cak kito ni lah banyak dikurangi. Buktinyo bae bensin. Lah keliling aku pom bensin, rato-rato lah dak ado lagi yang jualnyo. Pertalite tu lah adonyo. Padahal kan yang disubsidi pemerintah selamo ni bensin buat rakyat kecik.

Memang iyo, bensin masih ado dijual. Tapi nampaknyo icek-icek bae, sekedar syarat di SPBU. Banyak habisnyo daripado adonyo. Kalau Pertalite samo Pertamax, wai, tiap hari ado. Ini yang bikin rakyat kecik macam kito ni makin susah.

Mano nak mikir sekolah anak, belanjo rumah, nah sekarang ditambah harus beli Pertalite. Yang aku bingung ni, Wak, ngapo lah orang-orang dak protes samo keadaan ni. Kan lah jelas-jelas pemerintah ngurangi subsidi BBM, tapi dak ado yang protes.”

Wak Dolet samo Kulup melongok. Orang beduo ni seakan dak pecayo kalau yang ngomong barusan Si Bujang. Budak degil yang gayanyo cuek setengah mati tu.

Wak Dolet: “Ngapo harus protes kito, Jang. Kan kalau pakai Pertalite mesin kendaraan jadi terjago. Elok BBM tu dibanding bensin.”

Bujang: “Nah ini lah Wak ni. Samo bae macam yang lain. Mudah nerimo porpaganda.”

Kulup: “PROPAGANDA, Jang!”

Bujang: “Lah berubah berarti.”

Kulup nepuk jidat dewek.

Wak Dolet: “Sudah lah, Jang. Jangan protes di sini. Buat pening be. Hidup lah susah kau tambah susah lagi dengan cerito ni.”

Kulup: “Trus cam mano lah motor kau tu, Jang. Kalau dak kau isi Pertalite, nak kau dorong-dorong bae apo motor tu.”

Bujang: “Hah, tu lah Lup.“

Bujang nolehkan kepalonyo, dio nengok motornyo di parkiran.

Bujang: “Sayo ni ke sini nak minjam duit buat beli minyak.”

Tapi Bujang kebingungan nengok Kulup samo Wak Dolet dak ado lagi di depan. Ruponyo keduo kawannyo tu lah mbaco maksud si Bujang. Sehinggo lari dulu sebelum diutangin.(*)

Loading Facebook Comments ...
loading...