Jang Seru (Humor): Cucuk Cabut

0
Bujang Seru. Ilustrasi: Riko

Cerita pada rubrik “Bujang Seru” ini hanya fiktif. Jika ada kesamaan nama, tempat, waktu, maupun peristiwa, itu adalah kebetulan belaka.

Kulup: “Pagi, Wak…“

Wak Dolet: “Pagi jugo, Lup. Hah, kan enak nengok muko awak ni. Macam matahari, cerah nian!”

Kulup ketawo. Dio langsung nyebut namo Bujang.

Kulup: “Wak lah dengar dak nasib si Bujang?”

Wak Dolet: “Nah, ngapo kawan kito sekok tu?”

Penasaran, Wak Dolet duduk di samping Bujang.

Kulup: “Neee Wak ni, tengoklah dio di rumah. Sakit dio tu, Wak.”

Wak Dolet: “Wai! Yo nian apo?“

Kulup: “Iyo, Wak. Lah tigo hari dak kerjo.”

Wak Dolet: “Sakit apo dio, Jang?”

Kulup: “Sakit hati katonyo.”

Wak Dolet: “Awak ni ado-ado bae, Lup.”

Kulup: “Iyo nian, Wak. Nyo sakit hati samo toke-nyo.”

Wak Dolet: “Cam mano critonyo tu?”

Kulup: “Bujang ko kan petani, Wak. Gawenyo ngurus kebun ubi punyo toke dio. Nah, tigo bulan lalu, dio disuruh nanam ubi bibit paten. Adolah 10 batang.“

Wak Dolet: “Hah, trus?”

Kulup: “Jadi pagi tu Si Bujang begawelah. Ditanamnyo sepuluh batang ubi tu dekat sungai. Tujuannyo biak dekat dengan aek. Biak gampang nimbo-nimbo aek kalo habis ditanam. Tokenyo datang. Setuju dengan ide Bujang.

Seminggu berikutnyo, Wak, Si Toke datang marah-marah. Dio mintak ke Bujang ubi tu dipindahin. Dekat ke kebun karet bae. Si Bujang mulai bingung, soalnyo kemaren pas baru ditanam si Toke lah setuju, sekarang berubah pulak. Tapi kareno dio anak buah, nurut lah dio.

Dipindahinlah 10 batang ubi tu ke tempat yang ditunjuk toke. Habis tu baleklah si Bujang ko wak. Naaaah, besoknyo, toke nyuruh bujang mindahin lagi ke dekat kebun sawit.”

Wak Dolet geleng-geleng.

Kulup: “Dak itu bae, Wak. Saking anehnyo toke tu, habis dicucuk Bujang ubi tu ke tanah, eh, dicabut lagi samo si toke. Kek gitu terus. Sampai akhirnyo si Bujang stres. Akhirnyo dio sakit.“

Wak Dolet: “Wai, apo gawe toke si Bujang tu? Lah gilo, dak?”

Kulup: “Mungkin bae, lah, Wak.”

Bujang: “Wak, kopi kayak biaso, sekok.”

Wak Dolet samo kulup tekejut dengar suaro Bujang.

Wak Dolet: “Lah sehat awak, Jang?”

Bujang: “Lah, Wak. Tapi toke tu yang hari ni sakit.”

Wak Dolet: “Nah, ngapo cam tu?”

Bujang: “Kemaren kutebang segalo batang ubi di kebunnyo, Wak. Lantak lah situ.”

Kulup: “Wai, Jaaanggg, seram nian awak ni.”

Bujang: “Sapo yang mau begawe cucuk cabut-cucuk cabut cam tu, Wak. Buat sakit kepalak bae. Mending dak ado nian isi kebun tu, senang hati. Biaklah dio nanam dewek habis tu.”

Wak Dolet geleng-geleng. Dio jalan ke dapur.(*)

Loading Facebook Comments ...
loading...