Jang Seru (Humor): Kopiah

0
Bujang Seru. Ilustrasi: Riko

—-Cerita pada rubrik “Jang Seru” ini hanya fiktif. Jika ada kesamaan nama, tempat, waktu, maupun peristiwa, itu adalah kebetulan belaka.——

Hari ni Wak Dolet dak ado di warung. Kulup samo Bujang lah dari pagi di warung.

Bujang: “Ke mano lah Wak, ko?”

Kulup: “Ntah nian, Lup. HP-nyo dak aktif. Lah dari tadi kutelpon.”

Dak berapo lamo Wak Dolet datang. Di kepalaknyo ado kain diikat-ikat bebentuk topi.

Kulup: “Panjang umur Wak ni.”

Bujang: “Gagah topi Wak ni. Apo namo tu, Wak?”

Wak Dolet duduk di antaro Bujang samo Kulup.

Wak Dolet: “Sayo dikasih kawan. Ntah nian namonyo apo ni? Tapi kato orang lagi ngetren kini ko.”

Bujang-Kulup (serempak): “Bagi, Wak!”

Wak Dolet: “Kagek kuambek di mobil. Ado tigo kumintak ke dio. Memang untuk kamu beduo ni lah.”

Orang tuo tu pegi ke mobil. Ngambek topi unik tu, trus ngasih ke Bujang samo Kulup. Bentuk samo, cuma beda warno bae.

Sejak hari tu, tigo sekawan ni makai penutup kepalo yang kato orang lagi ngetren tu. Tiap hari topi tu dipakek samo ketigonyo. Sampai akhirnyo bulan berikut, Wak Dolet malah pakai kopiah.

Bujang samo Kulup protes.

Bujang: “Nah, lah pakek kopiah pulak orang tuo ni.”

Kulup: “Ntah nian. Awak lah ikut dio, dio brubah pulak.”

Wak Dolet santai bae. Duduk, nyeruput kopi trus mrokok. Cak dak ado doso.

Bujang: “Wak, dak dengar suaro kami, apo? Ai dah…”

Wak Dolet masih cak tadi. Slow bae dio.

Kulup: “Neee… orang tuo ni. Waaak….!”

Wak Dolet: “Iyo iyo! Nyanyuk nian kamu beduo ni. Aku makek kopiah ni untuk ngormati orang banyak. Kan negeri ni dak daerah kito bae yang punyo. Jadi jangan maksokan nian ngikut tren kito.”

Bujang: “Dak jelas, Wak, ni.”

Kulup: “Yo, dak jelas nian.”

Bujang: “Laju topi aneh ko nak kami apokan lah, wak?

Wak Dolet: Serah kamu, lah. Kan kamu nak makek, bukan sayo yang nyuruh.”

Kulup: “Memang Wak dak nyuruh, tapi Wak yang makek dulu mako kami ikut makek.”

Wak Dolet: “Makonyo jangan jadi penurut. Jadilah pembuat. Dah lah, kamu crito manjang. Utang kopi ko bayar. Lah sebulan nge-bon trus.”

Bujang samo Kulup tediam. Ditaroknyo topi tu, trus kabur.

Wak Dolet: “Oiiiii… Nak ke mano kamu beduo ni!”

Bujang: “Ado gawe, Wak!”

Kulup: “Bini aku nyuruh balek, Wak!”

Akhirnyo tinggallah Wak Dolet dewek, dengan duo topi unik di meja warungnyo.(*)

Loading Facebook Comments ...
loading...
Hosting Unlimited Indonesia MEDIA PARTNER: