Jang Seru (Humor): Pasrah Bae

0
Bujang Seru. Ilustrasi: Riko

Cerita pada rubrik “Jang Seru” ini hanya fiktif. Jika ada kesamaan nama, tempat, waktu, maupun peristiwa, itu adalah kebetulan belaka.

 

Wak Dolet lagi nyapu warung pas Bujang datang ngamuk-ngamuk.

Bujang: “Wak, ado kenal orang dinas dak?”

Wak Dolet: “Nak ngapo, Jang?”

Bujang: “Anak sayo yang gadis ni na, Wak. Nak masuk SMA. Payah nian urusannyo…”

Wak Dolet: “Betenang dulu, Jang. Bawak ngopi dulu.”

Bujang: “Yo lah, Wak. Yang kayak biaso, yo.”

Wak Dolet ke dapur. Dak berapo lamo, Kulup datang. Mukonyo kusut nian.

Bujang: “Apohal, Lup. Macam kau be yang susah kini, ko.”

Kulup: “Yo, Jang. Anak aku yang bujang nak kuliah, susah nian masuknyo. Dak lulus tes, bingung pulak nak kuliah di mano.”

Bujang: “Neee… senasib kito ni, Lup. “

Akhirnyo duo kawan ni saling curhat. Wak Dolet bawak duo gelas kopi. Ruponyo dari belakang dio lah dengar suaro Kulup yang datang.

Wak Dolet: “Kamu jangan panik. Kalau dak masuk negeri, ke swasta bae anak-anak kamu tu. Kalau semua ngejar sekolah negeri, sah dak biso nampung-nampung sekolahan di negeri ni.”

Bujang: “Persoalannyo, Wak. Kalau swasta, biayanyo tinggi. Dak telap kito. Mano nak bayar duit semester, mano nak ngasih jajan, pening, Wak.”

Kulup: “Yo, Wak. Kalau negeri, kan, agak ringan.”

Wak Dolet: “Ntah lah, Jang, Lup. Betul jugo kamu tu. Dulu jaman aku masih kecik, sekolah tu mudah nian. Malah banyak yang dak mau sekolah sehinggo pihak sekolah yang nyari murid. Sekarang tebalek, giliran anak nak sekolah, sekolahnyo yang dak biso nampung.”

Akhirnyo tigo sekawan tu menung. Bediaman bae di meja warung. Sementaro pelanggan Wak Dolet lah mulai rame.

Wak Dolet: “Sudahlah Jang, Lup. Kito bedoa be suatu saat kagek sistem sekolah balek ke lamo. Sehinggo dak ado yang saling salah menyalahkan. Yo, dak?”

Kulup: “Yo nian, tu, Wak. Mudah-mudahan biso kayak dulu. Yang penting anak-anak mau sekolah, dan sekolah biso nampung.”

Bujang: “Kayaknyo biso pasrah be lah sekarang ni, Wak. Anak aku nak kumasukkan ke sekolah swasta bae. Daripado dak sekolah.”

Wak Dolet: “Bagus lah kalau macam tu, Jang.”

Bujang: “Jadi, Wak dukung sayo, kan?”

Wak Dolet: “Yo, dukung lah, Jang.”

Bujang: “Kalau memang dukung, duit beli kopi selamo ni kubayari semester anak. Jadi sayo dak bayar lagi kalau ngopi tiap pagi di tempat, Wak.”

Wak Dolet tekejut. Kulup ketawo ngakak. Bujang langsung kabur.(*)

Loading Facebook Comments ...
loading...