Jang Seru (Humor): Protes Dana Haji

0
Bujang Seru. Ilustrasi: Riko

—– Cerita pada rubrik “Jang Seru” ini hanya fiktif. Jika ada kesamaan nama, tempat, waktu, maupun peristiwa, itu adalah kebetulan belaka.——

Kayak biaso, Bujang datang tibo-tibo. Wak Dolet yang lagi beres-beres warung, kayak biaso jugo, langsung kaget.

Wak Dolet: “Awak ni, Jang. Tiap datang, tiap bikin ribut.”

Bujang: “Wak, payo ikut sayo. Kawanin sebentar bae.”

Bujang nyambar sapu dari tangan Wak Dolet, trus ditaroknyo sapu tu di lantai. Wak Dolet protes lah dibuatnyo.

Wak Dolet: “Ne, kan, ngajak ribut nian.”

Bujang: “Ampun, Wak. Sayo nak mintak bantu, Wak. Penting nian ni, Wak.”

Wak Dolet: “Apohal?”

Bujang: “Ikut bae lah, Wak.”

Bujang pegi duluan ke parkiran, naek motor, distaternyo motor tu, trus dipanggilnyo Wak Dolet.

Bujang: “Payo, Waaak!”

Wak Dolet: “Bentar, kuomong ke orang rumah dulu.”

Bujang: “Kagek be ngasih tau lewat WA.”

Wak Dolet: “Ai, dah! Nah payo lah.”

Wak Dolet naek, dio megang pinggang Bujang kuat-kuat. Bujang langsung tancap gas. Ninggalin asap dari knalpot racing-nyo yang mekakkan telingo.

Seperempat jam perjalanan, sampailah duo orang tu di tujuan. Kantor dinas lah kayaknyo tempat orang tu berenti.

Sesudah markirkan motor, Wak Dolet turun, disusul Bujang. Wak Dolet langsung pucat.

Wak Dolet: “Ai, Jang, beruntung nian dak distop polisi kito ni. Ruponyo dak pakek helm kito beduo ni.”

Bujang: “Lantaklah, Wak.”

Bujang bejalan cepat masuk ke kantor tu. Petugas keamanan kantor nyetop langkah dio.

Petugas bekumis tebal: “Mau ke mana, Pak? Mau nemui siapa?”

Bujang: “Nak ketemu kepalak di sini. Sayo nak protes.”

Petugas bekumis: “Sudah buat janji sebelumnya?”

Bujang: “Ni punyo negara, sayo wargo negara, artinyo, kantor ni punyo sayo, otomatis kepalak kantor ni anak buah sayo. Ngapo pulak sayo nak mintak izin nian ngadap dio.”

Petugas bekumis: “Ya, Pak. Tapi tetap saja ada prosedurnya.”

Muko Bujang langsung merah padam. Nengok itu, Wak Dolet langsung belari meluk Bujang, trus disabarkannyo Bujang.

Wak Dolet: “Sudah lah, Jang. Tenang dulu. Kagek masuk penjaro awak ni ribut-ribut di kantor orang.”

Bujang: “Tapi, Wak.”

Wak Dolet: “Sudah! Malas sayo ikut awak lagi kalau macam ni. Nyesal nian sayo.”

Bujang nengok ke arah Wak Dolet yang mukonyo dak kalah merah dibanding muko dio.

Wak Dolet: “Ke kantin be kito.”

Bujang akhirnyo nurut. Dio ngikut Wak Dolet yang lebih dulu jalan ke kantin sebelah kantor tu.

Di kantin, Wak Dolet mesan kopi duo gelas. Hatinyo perih nian pas mesan tu.
Wak Dolet (dalam hati): “Biaso awak yang jual kopi, kini awak pulak yang beli. Aduiii…”

Trus ditengoknyo muko Bujang yang masam tu.

Wak Dolet: “Apohal, Jang? Macam besak nian masalah awak ni sampai-sampai ribut di kantor orang.”

Bujang: “Besak nian, Wak. Wak tau dak kantor apo ni?”

Wak Dolet: “Dak tau.”

Bujang: “Ni kantor yang ngurus urusan haji, Wak.”

Wak Dolet: “Lah, terus ngapo?”

Bujang: “Sayo ni protes nian, Wak. Masak iyo, dana haji kabarnyo nak dipakek dulu buat bangun infrastruktur. Padahal, ngumpulin duit sebanyak tu susahnyo mintak ampun, Wak. Berat nian buat orang kayak sayo ko.”

Wak Dolet: “Macam itu, yo, Jang? Kalau memang iyo, bagus lah dak. Daripado dana tu nganggur, lebih baek dipakek dulu untuk bangun negara.”

Bujang: “Wai, Wak. Dak setuju nian sayo. Yo kalo duitnyo balek, kalau idak? Biso batal berangkat haji. Mano nunggu lah lamo, tau-tau dak jadi berangkat haji gara-gara duitnyo habis dipakek sapo ntah.”

Wak Dolet diam. Diresapinyo kalimat Bujang tu.

Wak Dolet: “Iyo pulak dak, Jang. Kalo duit tu habis, dak jadi berangkat yang punyo duit.”

Bujang: “Nah, itu dio, Wak.”

Wak Dolet: “Laju, apolah nak awak buat, Jang?”

Bujang: “Pokoknyo sayo nak protes. Dak setuju!”

Mak-mak yang punyo kantin datang bawak duo gelas kopi. Di atas aeknyo masih nampak bubuk kopi mengapung. Dalam hati Wak Dolet nyesal nian mesan kopi yang bentuknyo dak sesuai buatan dio.

Tapi, tetap bae kopi tu diminumnyo. Apolagi Bujang lah habis setengah gelas.

Wak Dolet: “Jadi, Jang. Awak ke sini nak narek setoran haji, yo. Memang jadwal awak berangkat haji kapan, Jang?”

Bujang masih nyeruput kopi buatan mak-mak bekonde tu.

Bujang: “Apo, Wak?”

Wak Dolet: “Awak tu tahun berapo berangkat haji kalo ditengok dari daftar berangkat?”

Bujang: “Cam mano nak berangkat, Wak. Daftar be belum sayo ko.”

Wak Dolet: “Alamaaaaak.”

Bujang: “Kan baru rencano, Wak. Kalau suatu saat sayo daftar haji, trus duit sayo dipakek orang, jelas sayo dak setuju.”

Wak Dolet: “Tapi awak belum berangkat kan?”

Bujang: “Yo, belum lah, Wak.”

Wak Dolet: “Sah keno tangan anak ni.”

Wak Dolet tegak, terus nyekot kepalak Bujang. Bujang merengut, habis tu dio ketawo ngakak.(serujambi)

Loading Facebook Comments ...
loading...