Jang Seru: Orang Kayo

0
Bujang Seru. Ilustrasi: Riko

—–Cerita pada rubrik “Jang Seru” ini hanya fiktif. Jika ada kesamaan nama, tempat, waktu, maupun peristiwa, itu adalah kebetulan belaka.——

Bujang samo Kulup serempak sampai di warung Wak Dolet. Baru bae markirkan motor, orang beduo tu tekejut nengok pelanggan pado kabur sambil meludah-ludah.

Sambil ngerenyitkan dahi, Bujang nengok ke arah Kulup. Kulup cuma ngangkat bahu.

Di antaro orang-orang yang behamburan ke luar, Bujang samo Kulup jalan pelan ke dalam warung. Wak Dolet ke luar dengan muko cerah ceria.

Wak Dolet: “Pas nian kamu beduo datang. Duduklah, duduk. Wak lah nunggu nian kamu beduo ni.”

Bujang: “Apo hal pelanggan wak kabur galo tu?”

Kulup: “Yo, Wak. Apo hal?”

Wak Dolet: “Dah lah, jangan dipikir orang-orang tu. Wak kamu ni lagi senang. Kamu nak ikut senang jugo, dak.”

Bujang: “Hah, yang macam ni cocok nian, Wak.”

Kulup: “Senang kenapo, Wak?”

Wak Dolet masih kayak tadi. Senyum lebar terus. Malah sambil ketawo-ketawo kecik. Girang nian dio.

Wak Dolet: “Sayo baru dapat untung besak, Jang, Lup. Tanah yang disimpang lampu merah tu, tejual dengan hargo tinggi!”

Bujang: “Pantasss….”

Kulup: “Cicip, Wak…”

Wak Dolet: “Hahahaha… yo, aman lah kamu beduo tu.”

Bujang: “Memang brapo dibeli orang, Wak?”

Wak Dolet: “M-an lah. Cukup beli Pajero baru empat.”

Kulup: “Waiiiii… mantap nian tu, Wak.”

Wak Dolet: “Makonyo, senang nian skarang ni.”

Bujang samo Kulup diam-diam beharap dapat percikan dari Wak Dolet. Muko orang beduo ni lah ngarap nian.

Kulup: “Jadi dak nyicipin ke kami ni, Wak?”

Lah dak tahan lagi Kulup dibuatnyo.

Wak Dolet: “Jadi, lah! Tunggu bentar yo.”

Wak Dolet tegak, trus bejalan ke dapur. Orang beduo ni senang nian. Beharap Wak Dolet ke luar bawak duit sekarung.

Bujang (bisik-bisik): “Sah beli motor baru kito, Lup.”

Kulup (bisik-bisik jugo): “Yo, sah nian ni.”

Bujang samo Kulup mulai risau. Lah setengah jam, Wak Dolet belum jugo ke luar dari dapur.

Baru bae Bujang nak tegak, rencano nak nyusul Wak Dolet ke dapur, eh, Wak Dolet lah datang sambil bawak kopi duo gelas, lengkap dengan kue bolu.

Wak Dolet narok sepiring kue bolu samo kopi di meja depan Bujang-Kulup.

Bujang samo Kulup tengok-tengokan. Akhirnyo Bujang yang duluan makan kue bolu.

Bujang: “Fuaaah…”

Dimuntahkannyo kue tu ke lantai.

Kulup bingung. Penasaran, dio pulak yang nyubo kue bolu warna hijo tu.

Kulup: “Wueeeekkk…”

Dio muntah pulak.

Saking dak enaknyo, orang beduo tu minum kopi.

Bujang-Kulup (serempak): “Wueeekkk…”

Bujang: “Apohal asin galo ni, Wak!”

Kulup: “Ntah, Wak, ni. Kue bolu asin, kopi asin jugo!”

Wak Dolet malah marah.

Wak Dolet: “Kamu ni, kato nak nyicip duit orang kayo ni. Lah dicicipin ngejek pulak. Dak tau besukur.”

Bujang: “Tapi, Wak…”

Wak Dolet: “Kamu tau, dak, sekarang ni, garam lagi mahal nian di pasar. Saking mahalnyo, rumah makan bae lah ngurangi garam untuk sambal-sambalnyo.

Tapi karno Wak orang kayo, Wak beli garam yang mahal tu sebanyak-banyaknyo. Trus Wak campur ke kopi samo kue-kue. Biak semua pelanggan Wak puas makan garam di warung Wak.”

Bujang samo Kulup tegak, trus behamburan ke luar warung.(serujambi)

Loading Facebook Comments ...
loading...