Jang Seru: Panjat Pinang

1
Bujang Seru. Ilustrasi: Riko
Seperti biasa, tiap perayaan HUT RI, Wak Dolet paling semangat kalo dibilang panjat pinang. Hobi nian dio manjat pinang yang licin-licin becek tu. Apolagi kalau di atas pinang tu ado hadiah bagus-bagus, wai, makin semangat dio.
Wak Dolet: “Oi Jang, Lup, besok ikut yo. Biaso, manjat kito…”
Bujang samo Kulup yang lagi ngopi cuma biso nggeleng-geleng. Tapi dak enak nengok Wak Dolet yang lagi semangat nian tu.
Bujang: “Iyo, Wak, sayo ikut.”
Kulup: “Sayo jugo, Wak.”
Pas besoknyo, tigo sekawan ni ngumpul di Warung Seru punyo Wak Dolet. Wak Dolet keluar dengan pakaian olahraga, dak lupo kain sarung-nyo.
Bujang: “Gawe, Wak, ni. Tiap nak manjant pinang, tiap nak makek sarung. Nak manjat apo lah sebenarnyo Wak ko.”
Wak Dolet: “Nyenyes, payo lah.”
Berangkatlah orang tu ke lapangan di Kotabaru. Tapi sampai di situ, ketigo bingung, soalnyo baru nak nyampe, ado kabar panjat pinang diadokan pulo tempat lain.
Yang ngadokan rajo-rajo, hadiah macam-macam. Wak Dolet bingung, ditengoknyo timnyo cuma ado duo orang. Kalo dipakso manjat galo-galo, sah tekepor galo.
Wak Dolet ngambek inisiatif, ditelponnyo Ucok.
Wak Dolet: “Cok, ke sini yo, bantu kami manjat pinang.”
Ucok (di seberang telepon): “Siap, Wak. Kapan?”
Wak Dolet: “Sekarang. Kami tunggu di simpang Kotabaru, yo. Tapi, Cok…”
Ucok: “Tapi apa, Wak?”
Wak Dolet: “Ado duo tempat. Sanggup dak, Cok?”
Ucok: “Alaaaahhh… Cuma dua tempatnya, gampang kali itu. Ya sudah, aku ke situ ya. Atau gini, Wak tunggu aja di simpang itu, nanti kubawakkan hadiahnya.”
Wak Dolet: “Maksud apo, Cok?”
Ucok: “Biar aku yang selesaikan. Tinggal terima beres aja. Ok.”
Telepon ditutup. Wak Dolet, Bujang samo Kulup langsung bingung.
Bujang: “Dak ngerti sayo ni samo Ucok tu, Wak. Maksud tinggal beres tu apo?”
Kulup: “Cubo telpon lagi, Wak. Tanyo nian.”
Wak Dolet: “Ai ntahlah, kito tunggu bae dio.”
Setengah jam kemudian, Ucok datang bawak mobil double kabin. Brenti pas dekat orang betigo tu. Di bak belakang lah penuh hadiah. Mulai dari sepeda, HP, payung, rice cooker sampai batang-batang pinang nian ado di bak mobil Ucok.
Ucok bukak jendela, trus teriak-teriak.
Ucok: “Payo masuk… Cepaaat!”
Wak Dolet, Bujang samo Kulup tekejut. Tapi akhirnyo ngikut kato Ucok, ketigonyo masuk ke dalam mobil tu. Ucok langsung tancap gas.
Sampai di Warung Seru, dituruninlah pinang beserta hadiah-hadiah tu. Ketigonyo masih bingung tapi senang dapat hadiah gratis.
Lah di dalam warung, baru lah Ucok njelaskan smuanyo.
Ucok: “Tadi empat pinang kuambil. Untuk kita berempat.”
Bujang: “Tapi ngapo ado batang pinang jugo, Cok. Cam mano awak ni manjat pinang ni….”
Ucok: “Hahahaha… bentar yah…”
Ucok jalan cepat ke mobil. Masuk bentar, trus kluar lagi bawak mesin.
Wak Dolet: “Budak giloooo! Jadi kau tebang pakai gergaji sinso (chain saw) yo, Cok. Astagfirullah…”
Ucok, Bujang samo Kulup ketawo ngakak.(serujambi.com)
Loading Facebook Comments ...
loading...