Jang Seru : Salah Undang

0
Bujang Seru. Ilustrasi: Riko

Cerita pada rubrik “Jang Seru” ini hanya fiktif. Jika ada kesamaan nama, tempat, waktu, maupun peristiwa, itu adalah kebetulan belaka.

HARI lah Senin pulak. Bujang datang pakek baju batik Jambi. Keren nian penampilannyo. Parlente. Wak Dolet samo Kulup yang ado di Warung Seru nengokin dio dengan kagum.

Kulup: “Asli gagah nian awak ni, Jang.”

Wak Dolet: “Dari mano?”

Bujang duduk, ngambek tahu goreng, trus dikunyahnyo dengan lahap.

Bujang: “Sayo ko lagi dak enak hati, Wak. Baru be dari kondangan, di sano buat kesal bae.”

Wak Dolet: “Apo lagi lah masalah awak ni, Jang. Setiap hari ado be balak di awak ni.”

Bujang: “Ntah lah, Wak.”

Bujang makan gorengan lagi. Mulutnyo penuh.

Kulup: “Ngapo di undangan tu, Jang? Buat penasaran bae awak ni.”

Bujang: “Sabtu maren sayo dapat undangan, diantar orang ke kantor. Judulnyo buat Pak Kades. Nah, itu kan sayo. Undangannyo acara pawai di hari Senin. Sayo siap-siap lah.

Eh, dak tahunyo, pas sayo datang, Rajo yang ngundang salah tingkah. Sayo santai bae. Tapi sempat bingung jugo, Wak, Lup. Ngapo pas sayo datang dio salah tingkah?”

Bujang diam sebentar. Minum aek mineral gelas, trus ngoceh lagi.

Bujang: “Pas sayo tanyo-tanyo samo undangan lain, eh, ruponyo rajo tu ngundang wakil sayo. Sekdes. Pantas bae dio salah tingkah, Wak.”

Wak Dolet: “Nah, macam mano pulak tu, Jang? Yang di undangan atas nama awak, Pak Kades, ngapo rajo malah ngarap wakil awak yang datang?”

Bujang: “Tu lah yang sayo bingung, Wak. Lah macam musuh nian sayo dibuatnyo.”

Kulup: “Jangan buruk sangko, Jang. Sapo tau dio memang ngundang awak.”

Bujang: “Tapi orang yang sayo percayo ngomong, dio memang rencana nak ngundang wakil sayo, Wak. Bukan sayo. Malah, dio beharap sayo dak datang. Apo dak kesal sayo dibuatnyo.”

Wak Dolet: “Ai, yang ini sayo dak ikut-ikut lah, Jang.”

Kulup: “Iyo, politis nian ni, Jang.”

Bujang: “Tapi sayo santai bae, Wak, Lup. Sampai acara selesai sayo di situ. Dak berani dio ngusir sayo. Apolagi pas dio nak makso sayo pakek topi unik tu, sayo dak mau, apolagi sayo lah pakek kopiah, ngapo pulak nak pakek topi aneh tu. Yo, dak Wak, Lup?”

Bujang bingung, Wak Dolet samo Kulup lah dak ado lagi di tempat. Ngilang entah ke mano.(serujambi)

Loading Facebook Comments ...
loading...
Hosting Unlimited Indonesia MEDIA PARTNER: