Jang Seru: Sepi Nian

0
Bujang Seru. Ilustrasi: Riko
—–Cerita pada rubrik “Jang Seru” ini hanya fiktif. Jika ada kesamaan nama, tempat, waktu, maupun peristiwa, itu adalah kebetulan belaka.—–
Lah agak siang, Bujang belum jugo muncul di warung Wak Dolet. Padahal, sejak bukak, Kulup lah duluan datang ke warung tu. Wak Dolet betanyo ke Kulup.
Wak Dolet: “Mano Bujang? Lah lamo Wak dak nengok dio.”
Kulup: “Ntah jugo, Wak. Sejak Wak umroh, trus warung ni tutup, kami jarang nian ngumpul, Wak.”
Wak Dolet rencananyo nak ke dapur, tapi Bujang tampak bejalan lesu masuk ke warung.
Wak Dolet: “Dak berubah-rubah awak ni, Jang. Tiap datang, selalu be bawak masalah…”
Bujang: “Ntah lah, Wak… Kopi be dulu, baru ngoceh-ngoceh Wak tu.”
Wak Dolet geleng-geleng kepalak, tapi dio bejalan jugo ke dapur.
Dak lamo dio ke luar lagi sambil bawak duo gelas kopi. Habis tu duduk.
Wak Dolet: “Apo lagi crito awak ni, Jang.”
Bujang: “Sayo ko banyak urusan, Wak. Tepakso bolak-balek ke dinas-dinas di Telanai tu. Tapi, sejak badai maren, agaknyo susah nian nyari orang di sano.
Adolah kantor-kantor yang bukak, tapi ntah ngapo, pejabatnyo lah ngilang galo.”
Kulup: “Nah, samo, Jang. Sayo ngantar Mak ke Telanai jugo kayak gitu. Adolah orang-orangnyo, tapi lesu galo kutengok.”
Wak Dolet nyimak. Diminumnyo kopi Bujang sikit. Bujang melotot.
Wak Dolet: “Tu prasaan kamu beduo be. Sebenarnyo dak sepi, cuma lagi nak tutup tahun, jadi dak banyak gawe lagi pegawai di Telanai tu.”
Kulup: “Apo ado pengaruh dengan operasi tangkap tangan maren tu, dak, Wak? Jadi orang-orang di Telanai ketakutan.”
Bujang: “Hah, iyo, Wak.”
Wak Dolet bepikir sebentar.
Wak Dolet: “Mungkin iyo, mungkin jugo idak. Lagian kan rajo masih aman, Jang, Lup. Yang keno tangkap maren kan pion-pion bae…”
Bujang: “Kalau tetangkap jugo, cam mano, Wak?”
Wak Dolet: “Ai tu Wak dak berani komen, lah. Kito tengok be perkembangannyo.”
Habis ngomong tu, giliran kopi Kulup yang disedot Wak Dolet.
Wak Dolet: “Biak enak crito, cam mano kalo kamu beduo nambuh kopi.”
Kulup langsung besungut.
Bujang: “Cak nyo nak ngejar umroh lagi ni. Lah Wak yang nyedot kopi kami, kami pulak nak nambah biak bayar dobel. Sekolah di mano Wak ni!”
Wak Dolet samo kulup ketawo.(*)
Loading Facebook Comments ...
loading...
Hosting Unlimited Indonesia MEDIA PARTNER: