Wak dan Go Food

0
Bujang Seru. Ilustrasi: Riko

BUJANG, Ucok samo Kulup bingung pas sampai depan warung punyo Wak Dolet. Warung tu sepi, pengunjungnyo sekok duo, itupun cuma ngopi, idak makan apo-apo.

Sambil betanyo-tanyo dalam hati, tigo sekawan ni akhirnyo masuk jugo ke warung, duduk, trus manggil Wak Dolet.

Ucok: “Uwaaaakkkk! Di mana dirimu!”

Kencang nian pekikan Ucok, sampai-sampai Bujang samo Kulup kaget.

Bujang: “Dasar orang Batak, besak nian suaronyo.”

Ucok: “Biar besar, tapi kalau bernyanyi, alamak, merdu kali suara aku ini.”

Kulup yang dengar langsung perutnyo seraso mual, kayak nak muntah gitu.

Sebentar be Wak Dolet ke luar. Tangannyo bawak kayu bulat, sambil belari di ngejar ke arah Ucok. Ucok tekejut, tegak, trus belari kencang.

Wak Dolet: “Sini dulu kau, Cok. Siniii! Pagi-pagi lah mekakkan tlingo orang bae.”

Bujang samo Kulup cuma biso tediam di kursi. Dak lamo Wak yang masih megang kayu, duduk di antaro Bujang samo Kulup. Nafasnyo sekok duo, sengal ngejar Ucok.

Bujang: “Apohal, Wak, marah-marah.”

Kulup: “Ntah lah, Wak, ni. Padahal hari-hari lah tau suaro Ucok tu besak. Kami tau nian dak ado maksud dio nak ngusik, Wak.”

Wak Dolet ngambek aek, minum, trus meletakkan kayu di lantai.

Wak Dolet: “Astagfirullah… Iyo, dak. Wai… Bedoso nian sayo ko samo Ucok.”

Wak ngurut-ngurut dado. Bujang samo Kulup ngurut kepalak Wak Dolet.

Wak Dolet: “Ai dah. Ngapo pulak kepalak orang tuo kamu pegang-pegang ni. Nak bantu boleh, tapi dak gak gitu-gitu juga keleess…”

Bujang samo Kulup nyengir kudo dengar kalimat “gak gitu-gitu juga keles” yang keluar dari mulut Wak Dolet.

Bujang: “Gek kami ngomongi ke Ucok, Wak tu khilaf.”

Kulup: “Tapi ngapo gampang nian emosi Wak ni sekarang?”

Bujang: “Iyo, biasonyo penyabar Wak ni. Apohal, Wak?”

Wak Dolet diam, matonyo kosong macam orang lagi menung.

Wak Dolet: “Sayo ni lagi galau, Jang, Lup. Makin hari makin sepi bae warung ni. Padahal lah puluhan tahun Wak ngelolanyo. Sampai hari ni Wak dak tau apo penyebabnyo.”
Kulup samo Bujang yang gantian menung. Setengah jam orang betigo tu kayak gitu.

Wak Dolet akhirnyo tegak, trus ke belakang, habis tu dak nongol-nongol lagi. Bujang samo Kulup dak keenakan, akhirnyo balek jugo.

Besoknyo, Bujang, Kulup, samo Ucok yang takut-takut, datang lagi ke warung Wak Dolet. Masih macam kemaren, warungnyo sepi, sekok duo yang ado, dak sekokpun yang makan, cuma ngopi.

Tapi ado yang beda samo Wak Dolet. Dio ke luar warung sambil senyum-senyum. Cerah nian, macam bungo matahari lagi mekar-mekarnyo.

Dikejarnyo Ucok, Ucok tediam ragu-ragu, tapi langsung lega pas Wak Dolet meluk dio.

Wak Dolet: “Maaf yo, Cok, Wak emosi kemaren.”

Ucok salah tingkah.

Ucok: “Tak apa-apa, Wak, biasa ajalah. Sama Wak, mana pernah aku dendam, udah kuanggap orang sendiri Wak ni.”

Wak Dolet: “Sukurlah. Sebagai permintaan maaf, Wak gratiskan kopi samo makan kamu hari ni.”

Bujang-Kulup: “Asyiiiik!”

Wak Dolet: “Khusus Ucok bae, kamu beduo tetap utang.”

Bujang samo kulup merengut.

Lah tenang, barulah Ucok nanyo.

Ucok: “Wak kenapa bisa ceria kali hari ini, padahal masih sepi warung ni kuliat.”

Wak Dolet senyum lagi. Dio ngluarin hape dari kantong, trus nyentuh-nyentuh layarnyo, habis tu ditengokkanyo hape tu ke Ucok. Ucok nengok pasat-pasat, trus ngangguk-ngangguk.

Ucok: “Pantaslah kalau begitu.”

Bujang samo Kulup penasaran. Trus gantian nengok hape Wak Dolet. Akhirnyo keduonyo ngangguk-ngangguk jugo.

Ruponyo, warung Wak Dolet sepi karena orang-orang lah jarang ke luar rumah. Apo-apo dilakukan lewat hape. Beli baju, pesan lewat hape, transfer duit, habis tu baju diantar ke rumah. Beli kopi, cukup bukak hape, akses aplikasi GO FOOD, pesan, bayar, kopi diantar ke rumah.

Lamo-lamo, pelanggan Wak Dolet bekurang. Wak sempat bingung, tapi sesudah dikasih tau anaknyo yang masih SMA, trus warung kopinyo didaftarkan ke go food, dio jadi paham. Tiap hari ado be gojek yang datang, beli, habis tu ngantar ke pemesan lewat aplikasi tu. Jadi, biakpun warung kayak sepi, tapi pesanan lancar dan banyak. Makonyo Wak Dolet sekarang senang nian.

Wak Dolet: “Cam ni lah dak, jaman lah berubah. Kalau kito dak ikut jaman, sah ketinggalan kito. Apo-apo lah di-hape orang sekarang ni.”

Bujang, Kulup samo Ucok ngangguk-ngangguk.(serujambi)

Loading Facebook Comments ...
loading...
Hosting Unlimited Indonesia MEDIA PARTNER: